అమెరికాలో పొంగుతున్న జన సముద్రాలు

“ఈ రోజు నేను పదకొండు అరటి పండ్లు తిన్నాను, దారి పొడుగునా జనం ఇస్తూ వుంటే…” అన్నాడు అరోన్ బేకర్ అనే ఉపాధ్యాయుడు దీర్ఘ యాత్ర (మార్చ్) లో నడుస్తూ. ఈయన 8 వ గ్రేడ్ ( తరగతి) పిల్లలకు అమెరికా చరిత్ర బోధిస్తాడు. ఇప్పుడు చరిత్ర సృష్టిస్తున్న వారిలో తనూ ఒకరు.

‘’వానలు, మంచు, భూకంపాలు, ఉరుములు ఏవీ మమ్మల్ని ఆపలేవు,  చలి వానలో గడ్డగట్టుకపోతున్నా, బొబ్బలెక్కి పాదాలోంచి నెత్తురు చిమ్ముతున్నా మా మార్చ్  ఆగదు” అని నినదిస్తూ 110 మైళ్ల మార్చ్ నిర్వహించారు ఓక్లాహోమా రాష్ట్రంలో పబ్లిక్ స్కూల్ టీచర్లు.

పబ్లిక్ స్కూళ్లకు నిధులు పెంచాలని, ఏప్రిల్ 6 నుంచి వారం రోజులు 150 మంది టీచర్లు తుల్సా అనే పట్టణం నుంచి ఆ రాష్ట్ర రాజధాని నగరమైన ఓక్లాహోమా దాకా మార్చ్ నిర్వహిస్తే, వీరికి అన్న పానీయాలు, సాక్సులు, షూస్, చలి కోట్లు అందిస్తూ, “మేం వున్నాం మీ వెంట” అంటూ వేలాది మంది ప్రజలు ఎర్ర టీ షర్టులు ధరించి వీరితో పాటు నడిచారు.

మార్చ్ ఓక్లాహోమా సిటీ చేరుకోగానే, వారిని వేలాది మంది విద్యార్థులు, విద్యార్థుల తలిదండ్రులు కలుసుకున్నారు.   తుల్సా పట్టణం స్కూల్ సూపరెంటెండెంట్ డెబొర గిస్ట్ మార్చ్ కు ఎదురెళ్లి “ ఐ లవ్ యూ ఆల్ “ అంటూ కన్నీళ్ల పర్యంతం అయ్యారు. ఆమె కన్నీళ్ళు తుడుచుకుంటూ,” ఇది ర్యాలీ కాదు, ఇది నిరసన కాదు, ఇది ఉద్యమం. సంఘటనలతోనే ఉద్యమాలు తయారవుతాయి, ఇది కేవలం ఒక సంఘటన కాదు. గొప్ప ఉద్యమంలో భాగం” అన్నారు. ఈమె ఆ వారం రోజులు తుల్సా కౌంటీ (జిల్లా) లో స్కూళ్ళని మూసివేస్తున్నట్టు ప్రకటించడమే కాక  రాష్ట్రంలోని అన్ని కౌంటీల సూపరెంటెండెంట్లకు తమ పరిధుల్లోని స్కూళ్లను మూసివేయాలని విజ్ఞప్తి చేశారు. ఒక పక్క మార్చ్ సాగుతుండగా ఓక్లాహోమా రాష్ట్రమంతటా 45,000 మంది టీచర్లు వారం రోజులు సమ్మెలో పాల్గొన్నారు. ప్రతి చిన్న పెద్ద పట్టణాల్లో ఎర్ర టీషర్టులు ధరించి వూరేగింపులు నిర్వహించారు. రోడ్లన్నీ ఎర్ర సముద్రం ముంచెత్తినట్లు తలపించాయి.

‘మా జీతాల పెంపు కోసం మాత్రమే కాదు, స్కూళ్ల నిర్వహణకు తరుగుతున్న నిధుల వల్ల  పెరుగుతున్న సమస్యల పరిష్కారం కోసం మేము ఆందోళన చేస్తున్నాం” అని టీచర్లు ప్రకటించారు. పబ్లిక్ స్కూళ్లలో టీచర్ల కొరత వున్నా నియామకాలు జరగడం లేదు. 2008లో ఏర్పడిన ఆర్థిక సంక్షోభం కారణంగా టీచర్ల జీతాలు, స్కూళ్ల నిధులు 15%- 20% తగ్గించారు. పరిస్థితులు చక్కబడినా 2015 నుంచి ఎలాంటి పెరుగుదల లేకపోగా, మరిన్ని కోతలు విధించారు. మరో పక్క ధనవంతులకు భారీ ఎత్తున పన్నులు తగ్గించారు. ధనవంతుల పన్నులు తగ్గించడమంటే స్కూళ్లకు నిధులు తగ్గించడమే. పన్నుల వసూళ్లల్లో  50% పబ్లిక్ స్కూళ్ల నిర్వహణ, టీచర్ల జీతాలు, పెన్షన్ల కోసం వుపయోగిస్తారు. ధనవంతుల పన్నులు తగ్గించడమంటే నేరుగా పబ్లిక్ స్కూళ్లను ఎండబెట్టడమే. అధ్యక్షుడు డొనాల్డ్ ట్రంప్ చేసింది సరిగ్గా అదే. ఇదే సమయంలో అమెరికాలో ప్రయివేటు స్కూళ్లు వృద్ధి చెందడం

కాకతాళీయం కాదు. ఉద్దేశపూర్వకం.

అమెరికాలో అత్యధికంగా పబ్లిక్ స్కూళ్లే వున్నాయి. వీటిలో అన్ని సౌకర్యాలు వుంటాయి గాని, పిల్లల మీద ఫీజుల భారం వుండదు. ఇప్పుడు పబ్లిక్ స్కూళ్ల ను మూసివేసి ఖరీదైన ప్రయివేటు స్కూళ్ల ను పెంచడానికి ఇదొక ‘పన్నాగం’’ అనే అనుమానం బలపడుతోంది.

ట్రంప్ ను గెలిపించిన రాష్ట్రాల్లోనే  టీచర్ల సమ్మెలు పెద్ద ఎత్తున జరగడం మరొక గమనార్హ విశేషం.  

అమెరికా సంయుక్త రాష్ట్రాల్లో తూర్పూ పడమరల్లో డెమొక్రటిక్ పార్టీకి పట్టు వుండడంతో  వాటిని బ్లూ స్టేట్స్ అని, అమెరికా దక్షిణాదిన, మధ్య అమెరికాలో రిపబ్లికన్ పార్టీకి పట్టు వున్న వాటిని రెడ్ స్టేట్స్ అనడం వాడుక.  డోనాల్డ్ ట్రంప్ ను గెలిపించిన ‘ఎర్ర’ రాష్ట్రాల్లోని టీచర్లు వేలాది మంది ఎర్ర చొక్కాలు వేసుకొని ఊరేగింపులు, సమ్మెలు, ప్రదర్శనలు, పాదయాత్రలు(మార్చ్) చేస్తున్నారు. గత మూడు నెలల్లో ఆరు రాష్ట్రాల్ని  టీచర్ల ఊరేగింపులు ఎర్ర సముద్రాల్లా ముంచెత్తాయి. సమ్మెలు మరిన్ని దక్షిణాది రాష్ట్రాలకు విస్తరించే సూచనలున్నాయి.

అమెరికా పబ్లిక్ స్కూల్ టీచర్లలో  అత్యధికంగా (77%) స్త్రీలే పనిచేస్తున్నారు. ‘’ఇది స్త్రీల రంగం. కనుకనే వేతనాలు తక్కువగా వున్నా’’యని అంటారు కెంటకీ స్టేట్ రెప్రజెంటెటివ్ అటికా స్కాట్. ఈమె కెంటకీ రాష్ట్రం జనరల్ అసెంబ్లీలో ఉన్న ఒకే ఒక్క ఆఫ్రికన్-అమెరికన్.  ‘’టీచర్ల ఉద్యమాన్ని స్త్రీలే నాయకత్వం వహించి నడుపుతున్నారు. టీచర్లలో స్త్రీలే ఎక్కువ సంఖ్య. స్త్రీలు అత్యధికంగా పనిచేసే రంగమంటే రాజకీయ నాయకులకు చులకన. అందుకే టీచర్ల వేతనాలు తగ్గించడమే కాక, స్కూళ్లకు కేటాయించాల్సిన నిధుల్ని కూడా గణనీయంగా తగ్గించారు. చట్ట సభల్లో స్త్రీల ప్రాతినిధ్యం లేకపోవడం వల్ల ఇలాంటి సమస్యలు తలెత్తుతున్నాయి, చట్టసభలను స్త్రీలు ఆక్రమించాలి ‘’ అని అంటారు ఆమె.

పబ్లిక్ స్కూల్ లోని ఒక్కో క్లాస్ రూం లో 10-20 మించకుండా విద్యార్థులుండాలి. ఒక్కో గ్రేడ్ లో  విద్యార్థుల సంఖ్యను బట్టి క్లాస్ రూం లుంటాయి. (ఇండియాలో ఒక్కో తరగతిని కొన్ని సెక్షన్లుగా విభజించినట్లు అమెరికాలో ఒక్కో గ్రేడ్ ను క్లాసులుగా విభజిస్తారు). చాలా రాష్ట్రాల్లో గత పదేళ్లుగా  టీచర్ల నియామకాలు జరగకపోవడంతో 40-45 మంది విద్యార్థులుండే పెద్ద క్లాస్ రూంలు ఏర్పడ్డాయి. కొన్ని చోట్ల ముఖ్యంగా గ్రామీణ ప్రాంతాల్లో, వారంలో 4 రోజులు మాత్రమే స్కూల్ పని చేస్తున్నది. కొన్ని స్కూళ్లో నర్సుల నియామకం లేదు. మరికొన్ని స్కూళ్లలో ఆర్ట్ టీచర్లు, సెకండ్ లాంగ్వేజ్ ( స్పానిష్) బోధించే టీచర్లు వుండడం లేదు. చలికాలంలో కూడా స్కూల్ బిల్డింగ్ లకు హీట్  సౌకర్యాలు లేకపోవడం, బాత్ రూములో పేపర్ లేకపోవడం వంటి సమస్యలతో పాటు బుక్స్ కొనలేకపోవడం వల్ల టీచర్లు పాత పుస్తకాల్ని సేకరించి విద్యార్థులకు పంచుతున్నారు, పెన్సిళ్లు, పేపర్లు టీచర్లే తమ డబ్బుతో కొని తమ క్లాస్ విద్యార్థులకు ఇస్తున్నారు. అమెరికాలోని పబ్లిక్ స్కూళ్లకు, హీట్, ఏసీ సౌకర్యాలతో కూడిన విశాలమైన స్కూల్ బిల్డింగ్, మ్యూజిక్, ఆర్ట్ టీచర్లు, వారికి ప్రత్యేకమైన క్లాస్ రూములు (పిల్లలకు  డ్రాయింగ్ పేపర్లు, కలర్స్ స్కూల్ నుంచే ఉచితంగా ఇవ్వడం రివాజు). రెండు, మూడు భాషలు బోధించే టీచర్లు, ట్రైనింగ్ పూర్తి చేసుకున్న నర్సు, కొన్ని ఫస్ట్ ఎయిడ్ మందులతో పాటు రెండు మూడు బెడ్స్ వున్న ఒక డిస్పెన్సరీగా ఇక రూం, ఆటల టీచర్లు, లైబ్రరీ, లైబ్రేరియన్లు ఉంటారు. ఉండాలి. విద్యార్థులు ఇంటి నుంచి బుక్స్ మోసుకెళ్లక్కర్లేదు. వర్క్ బుక్ లు, పెన్సిళ్లు, ఎరేజర్లు, షార్పెనర్లు క్లాస్ రూంలో వున్నంత వరకు స్కూలువే వుపయోగించుకుంటారు. (ఇదంతా ఎలిమెంటరీ స్కూల్స్ గురించి  మాత్రమే).

చాలా రాష్ట్రాల్లో ముఖ్యంగా దక్షిణాది రాష్ట్రాల్లో టీచర్ల జీతాలు ఏడాదికి  30-45 వేల డాలర్ల లోపే వుంటున్నాయి. న్యూయార్క్ స్టేట్ లో మాత్రమే ఏడాదికి 70- 80 వేల డాలర్ల వరకు వేతనాలు ఉంటున్నాయి. టీచర్ల వేతనాలు అత్యధికంగా వున్న ఒకే ఒకటి న్యూయార్క్ స్టేట్. రెండో స్థానంలో వున్న కాలిఫోర్నియా, మసాచ్యుసెట్స్ రాష్ట్రాల్లో  ఏడాదికి 60- 70 వేల డాలర్ల వేతనాలున్నాయి. మిగిలిన కొన్ని నార్త్ ఈస్ట్ రాష్ట్రాల్లో టీచర్ల వేతనాలు 60-50 వేల వరకు ఉన్నాయి. ఏడాదికి $ 30- 45 వేల మధ్య జీతాలున్న వాళ్లు జీవిత అవసరాల కోసం రెండు ఉద్యోగాలు చేయాల్సి వస్తున్నది. టీచర్లు తమ సమయానంతా ఒక్క జాబ్ కే పరిమితం చేయకపోతే పేద విద్యార్థులు నష్టపోతారు.

పబ్లిక్ స్కూళ్ళలో అరగొర సౌకర్యాల మధ్య చదువు సరిగా సాగడం లేదని, కొందరు టీచర్లే తమ పిల్లలను ప్రయివేటు స్కూళ్లకు పంపుకుంటున్నారు.  “బలమైన వ్యక్తిత్వం పొందేలా పిల్లల్ని తీర్చిదిద్దడం తేలిక కాని, ధ్వంసమైన మనిషిని బాగుచేయడం కష్టం” అంటాడు ఫ్రెడరిక్ డగ్లస్. రోజు రోజుకు కునారిల్లుతున్న పబ్లిక్ స్కూళ్ల వల్ల  పిల్లలు ఎలా తయారవుతారన్న భయం కూడా ఇప్పుడు టీచర్లకు పట్టుకుంది. “పిల్లలంటే భవిష్యత్తు. ఈ రాష్ట్రం భవిష్యత్తు, ఈ దేశం భవిష్యత్తు. మా విద్యార్థులకు ఇన్నాళ్ళు తన కోసం తను నిలబడాలని చెప్పాం, కాని ఇప్పుడు మా వంతు వచ్చింది, మా కోసం మేం నిలబడడమే కాకుండా, మా విద్యార్థుల కోసం కూడా మేము నిలబడాల్సిన పరిస్థితులు తోసుకొచ్చాయి” అని అంటున్నారు టీచర్లు.

“విద్యార్థులకు ఎదురవుతున్న సమస్యలను చూస్తూ ఎన్నాళ్ళు మౌనంగా వుండాలి? అపరాధభావనతో గుండె పగిలిపోతున్నది. ఇప్పుడు కాకపోతే, ఎప్పుడు? మేము కాకపోతే ఇంకెవరు? అనే ప్రశ్న ఎదురైంది నాకు. క్లాస్ రూం వదిలి పికెట్ లైన్లో నిలుచున్నాను’’ అని ‘ఏడ్యుకేషన్ వీక్’ లో రాసింది వెస్ట్ వర్జినీయా టీచర్ టోనో ఏం. పోలింగ్. ఈమె వెస్ట్ వర్జినీయా టీచర్ ఆఫ్ ది ఇయర్, 2017గా ఎంపికైన అధ్యాపకురాలు.

టీచర్ల సమ్మె మొదట రాజుకున్నది వెస్ట్ వర్జినీయా రాష్ట్రంలో  ఫిబ్రవరి 22న. యూనియన్ల ద్వారా సంఘటితమై సమ్మెకు దిగలేదు టీచర్లు. ఆరు రాష్ట్రాల్లోనూ సమ్మెలు టీచర్ యూనియన్ల ద్వారా, అంటే పై నుంచి దిగుమతి కాలేదు. టీచర్లు సంఘటితమైన తర్వాత, తమ ఉనికి కోసం తప్పని సరై యూనియన్లు కలిసి వచ్చాయి. ఒక రకంగా కింది నుంచి  వచ్చిన చొరవ పైకి పాకింది. ప్రపంచ వ్యాప్తంగా యూనియన్ల పని ముగిసిందనీ, అవి పూర్తిగా చతికిల పడ్డాయనీ కార్మిక అనుకూల శక్తులు తీవ్ర నిరాశకు, అసంతృప్తికి గురవుతున్న సందర్భంలో జరిగిన ఈ సమ్మెలు అమెరికాలోనే కాదు ఇతర దేశాలలోని శ్రామికులకు ఉత్సాహాన్నీ, ప్రేరణనీ అందిస్తాయనడంలో సందేహం లేదు..

వెస్ట్ వర్జినీయాలోని, చార్లెస్టోన్ (Charleston) లో 7 వ గ్రేడ్ కు ఇంగ్లీష్ టీచర్ గా పనిచేస్తున్న జాయ్ ఓ నీల్, తన సహోద్యోగి ఎమిలి కోమర్ తో కలిసి అక్టోబర్ (2017)లో ‘పబ్లిక్ ఎంప్లాయిస్ యునైటెడ్’ అనే ఒక ఫేస్ బుక్ గ్రూప్ ను ఏర్పాటు చేశాడు. వెస్ట్ వర్జినీయాలో రెండు ముఖ్యమైన టీచర్ సంఘాలున్నాయి. అవి ఒక దానికి వ్యతిరేకంగా మరొకటి పనిచేయడమే పనిగా పెట్టుకోవడంతో  తీవ్రమైన నిరాశకు లోనయిన జాయ్ ఓ నీల్ టీచర్ల యూనియన్ నుంచి బయటికి వచ్చి ఫేస్ బుక్ గ్రూప్ ను ప్రారంభించాడు. జనవరి కంతా 20 వేల మంది సభ్యులుగా చేరడంతో ఇది టీచర్లకు ముఖ్యమైన హబ్ గా మారిపోయింది. టీచర్లు, స్కూళ్ళు వదిలాక, పేరెంట్స్ ను కలిసి స్కూళ్లల్లో నిధుల కొరత వల్ల ఏర్పడిన సమస్యలను వివరించడం మొదలుపెట్టారు. పేరెంట్స్ నుంచి మంచి స్పందన లభించడంతో చాలా తొందరగా రాష్ట్రమంతటా పబ్లిక్ స్కూళ్ల  టీచర్లు సమ్మెకు సిద్ధమైనారు. ఈ సమయంలో రెండు యూనియన్లు ఐక్యంగా రంగ ప్రవేశం చేశాయి. అలా సమ్మె పుట్టుకొచ్చింది. సర్వసాధారణంగా యూనియన్లు సమస్యలపై శ్రామికుల్ని సంఘటితం చేసి, సమ్మె చేయాలని, ఏ డిమాండ్లతో ఎలా పోరాడాల్సింది ఆదేశాలిస్తాయి. కాని టీచర్లే తమకు తామే సంఘటితమై, పైకి (యూనియన్లకు) ఆదేశాలిచ్చారు. ఈ రాష్ట్రంలో పబ్లిక్ స్కూల్ టీచర్లు సమ్మె చేయడం చట్ట విరుద్ధం. కానీ సమస్యలు వారిని సమ్మెకి పురికొల్పాయి. సంఘటితంగా పోరాడితే విజయం సాధించవచ్చని పట్టుదలగా సమ్మెకు సిద్ధమైనారు. రాష్ట్రంలోని 55 కౌంటీస్ (జిల్లాలు)లోని 680 పబ్లిక్ స్కూళ్ల లోని 20 వేల మంది టీచర్లు  ఎర్రని షర్టులు ధరించి, 9 రోజులు సమ్మె కొనసాగించి, వేతనంలో 5% పెంపును, స్కూళ్లకు నిధుల పెంపును సాధించుకున్నారు. వెస్ట్ వర్జినీయా టీచర్ల సమ్మె జరిగిన తీరు, వారు సాధించిన విజయం ఇతర రాష్ట్రాల పబ్లిక్ స్కూల్ టీచర్లకు ఒక బ్లూ ప్రింట్ లాగా ఉపయోగపడడమే గాక వారిలో గొప్ప ఉత్సాహాన్ని నింపింది.

ఓక్లాహోమా రాష్ట్రంలోని టీచర్లు కూడా సోషల్ మీడియా ద్వారానే సంఘటితమయ్యారు. ఈ రాష్ట్రంలో ఏప్రిల్ 6న పబ్లిక్ స్కూల్ టీచర్ల సమ్మెలు మొదలై వారం రోజులు సాగాయి. రాష్ట్ర వ్యాప్తంగా 45 వేల మంది టీచర్లు  ఎర్రని టీ షర్ట్స్ ధరించి సమ్మెలో పాల్గొన్నారు. తుల్సా నగరం నుంచి ఓక్లాహోమాకు 110 మైళ్లు మార్చ్ నిర్వహించి స్కూళ్లకు నిధులు పెంచుకోవడమే గాకుండా, తమ వేతనాల్లో సగటున ఏడాదికి $6000 పెంపును సాధించుకున్నారు.

ఓక్లాహోమా టీచర్ల సమ్మె ముగిసిన మరునాడే,  కెంటకీ రాష్టంలోని టీచర్లు రాష్ట్ర రాజధాని ఫ్రాంక్ ఫర్ట్ లో ఏప్రిల్ 13 న స్కూళ్లను మూసివేసి , ఎర్రని టీ షర్టులు ధరించి ప్రదర్శన నిర్వహించారు. గవర్నర్ వీటోను కాదని, లెజిస్లేచర్లు ఓట్ వేయడం వల్ల పబ్లిక్ స్కూళ్ల నిధులు పెరిగాయి.

ఆరిజోనా రాష్ట్రంలోని 50,000 మంది టీచర్లు వారం రోజులు సమ్మె చేయడంతో  ఏప్రిల్ 26 నుంచి మే 3 వరకు 110 కౌంటీలలో వెయ్యికి పైగా స్కూళ్లు మూతపడ్డాయి. రాష్ట్రమంతటా ప్రదర్శనలు, వూరేగింపులు జరిగాయి. సమ్మె మొదటి రోజునే టీచర్ల జీతాలు 1% పెంచుతానని గవర్నర్ ప్రకటించినా సమ్మె కొనసాగించారు. వేతనాలు 20% పెంచాలని, స్కూళ్ల నిధుల్ని 1 బిలియన్ డాలర్లకు పెంచాలని డిమాండ్ చేశారు. కొన్ని సంవత్సరాలుగా ఏదో తప్పు జరుగుతోందని తెలుస్తోంది కాని, ఏం చేయాలో తెలియలేదు వారికి. సమ్మెల కెరటాలు ఒక్కో రాష్ట్రంలో ఎగిసిపడే సరికి వారికి ఆత్మస్థైర్యం వచ్చింది. మార్పు కోసం తామూ సమ్మె చేయాలని ఫేస్ బుక్ ద్వారా సంఘటితమయ్యారు.

కొలరాడో రాష్ట్రంలో పబ్లిక్ స్కూల్ టీచర్ల సమ్మె రెండున్నర వారాలు, ఏప్రిల్ 27 నుంచి మే 12 వరకు సాగింది.  పబ్లిక్ స్కూల్ టీచర్ల సమ్మె చట్ట విరుద్ధమని, సమ్మెలో పాల్గొనే టీచర్లకు రోజుకు 5 వేల డాలర్ల జుర్మానా, ఆరు నెలలు జైలు శిక్ష విధించాలనే బిల్లు ప్రవేశపెట్టారు ఇద్దరు రిపబ్లికన్ స్టేట్ సెనేటర్లు. కానీ సబ్ కమిటీ ఈ బిల్లును తీవ్రంగా విమర్శించడమే గాక తిరస్కరించింది. 2019 మళ్లీ టీచర్లు సమ్మె చేస్తే మళ్లీ బిల్లును ప్రవేశపెడతానని రిపబ్లికన్ స్టేట్ సెనేటర్ బాబ్ గార్డినర్ బెదిరించాడు.  డెమొక్రటిక్ గవర్నర్ పబ్లిక్ స్కూళ్ళ నిధులను ఏడాదికి $ 150 మిలియన్ డాలర్లు పెంచుతూ, టీచర్ల వేతనాలను 2% శాతం పెంచుతున్నట్టు ప్రకటించారు.

నార్త్ కరోలినా రాష్ట్రంలోని టీచర్లు 20,000 మంది  ముకుమ్మడిగా సెలవు పెట్టి మే 16 న రాష్ట్ర రాజధాని నగరమైన ర్యాలీ (Raleigh) లో ఎర్ర టీ షర్ట్ లు ధరించి ప్రదర్శనలు నిర్వహించారు.

పబ్లిక్ స్కూల్ టీచర్లు తమ వేతనాల సమస్యను మాత్రమే కాకుండా ప్రధానంగా స్కూళ్ల సమస్యను, విద్యార్థుల సమస్యను ముందుకు తీసుకరావడంతో టీచర్ల సమ్మెలకు ప్రజల నుంచి అనుహ్యమైన స్పందన లభించింది. ఉచిత విద్యను పొందడం పౌర హక్కుగా  భావిస్తున్నారు టీచర్లూ, ప్రజలూ. న్యాయ నిపుణులు, విద్యారంగంలో పనిచేసే నాయకులు సైతం పబ్లిక్ స్కూళ్ల సమస్యలపై దృష్టి సారించాల్సిన పరిస్థితులు ఏర్పడ్డాయి.

  • ఎస్. జయ

 

 

 

 

ఎస్. జయ: కవి, కథకురాలు. చిరకాలం ఎమ్మెల్ పార్టీలో పని చేసిన క్రియాశీలి. ఆ సమయంలో పొర్టీ పత్రిక ‘విమోచన’లో, తరువాత ‘ఈనాడు’లో, ‘నలుపు’ పత్రికలో సంపాదక బాధ్యతలు నిర్వహించారు. ‘విరసం’ లో చురుగ్గా పని చేయడమే గాక, పలు సంవత్సరాలు ‘విరసం’ జంటనగరాల కన్వీనర్ గా పని చేశారు. ‘అన్వేషి’ అనే స్వచ్చంద సేవా సంస్థల్లో కో ఆర్డినేటర్ గా బాధ్యతలు నిర్వహించారు. ‘మట్టి పువ్వు’ అనే కవితా సంపుటినీ, ‘రెక్కలున్న పిల్ల’ అనే కథా సంపుటినీ వెలువరించారు. పలు పుస్తకానువాదాలు, విడి అనువాదాలు చేశారు.

ఎస్. జయ

ఎస్. జయ: కవి, కథకురాలు. చిరకాలం ఎమ్మెల్ పార్టీలో పని చేసిన క్రియాశీలి. ఆ సమయంలో పొర్టీ పత్రిక 'విమోచన'లో, తరువాత 'ఈనాడు'లో, 'నలుపు' పత్రికలో సంపాదక బాధ్యతలు నిర్వహించారు. 'విరసం' లో చురుగ్గా పని చేయడమే గాక, పలు సంవత్సరాలు 'విరసం' జంటనగరాల కన్వీనర్ గా పని చేశారు. 'అన్వేషి' అనే స్వచ్చంద సేవా సంస్థలో కో ఆర్డినేటర్ గా బాధ్యతలు నిర్వహించారు. 'మట్టి పువ్వు' అనే కవితా సంపుటినీ, 'రెక్కలున్న పిల్ల' అనే కథా సంపుటినీ వెలువరించారు. పలు పుస్తకానువాదాలు, విడి అనువాదాలు చేశారు.

5 comments


Type Comments in Indian languages (Press Ctrl+g to toggle between English and Telugu OR just Click on the letter)

  • Madam it’s very useful to teacher unions and teachers in the present day scenario. To improve the school conditions along with the salaries of the teachers’ is a nice one. So the teacher’s could get the support from the public to the movement. Even in andhra when the teacher union’s will know this. Any way nice informative article. Thank you.

  • మీ వ్యాసాల ద్వారా మాకు భిన్న కోణం లో అమెరికా దర్శనం ఇస్తోంది.పాపులర్ మీడియా లో అమెరికా అంటే ఒక భూతాల స్వర్గం అక్కడ టీచర్స్ కు కంపెనీ అధిపతులకంటే జీతాలు ఎక్కువని పాఠశాల చదువు మొత్తం ఉచితమని చెబుతున్న వాదన లోని డొల్ల తనాన్ని మీ వ్యాసం తెలియచెప్పింది.

Categories

Your Header Sidebar area is currently empty. Hurry up and add some widgets.