August 15-31, 2018 కవిత

రాత మారిన అక్షరం

August 14, 2018

అక్షరమంటే
కలువ పూల చెరువులో
స్నానమాడే
అందమైన చందమామ

గుండె గూడు నుండి
ఒకటొక్కటిగా
జారి పడే తేనె చుక్క

నరాల తీగలపై చిగురించి
మనసులో విరిసే
మల్లెపూల పందిరి

ఆకాశం నల్ల చీరపై
తళుకు మెరుపుల
జలతారు అంచు

గుండె ఉలిక్కిపడేలా
నిరంతర చైతన్యాల
ఉరుముల ఫెళ ఫెళ
భావోఉద్వేగాల జెండా రంగుగా నిలిచినా,
అనుభూతుల హరివిల్లయ్ పూసినా
నిశీధి విషాద గీతాల
అశ్రు కణాలుగా జారినా
అక్షరం
భావ సుగంధాన్ని పూసే
చల్లని చందనం
ఇప్పుడది
మాట ఒద్దిక లేక,
రాత పొంతన లేక
గాజు కుప్పెలో వాలి
గులకరాళ్ళ మధ్య
ప్లాస్టిక్ పూలు పూస్తున్నది.

టి వి ఎస్ రామానుజ రావు

టి.వి.ఎస్. రామానుజ రావు: మొదటి కధ (హాస్య కధ) జ్యోతి మాస పత్రిక 1989 దీపావళి సంచికలో ప్రచురితమైతే, మొదటి కవితల పుస్తకం (అన్వేషణ) 1989లోనే వెలువడింది. రెండో పుస్తకం 2016లో కాలిఫోర్నియాలో ఆవిష్కరించారు. హాస్యం, ప్రకృతి ఇష్టమైన అంశాలు. దాదాపు 40 సంవత్సరాలు బ్యాంకింగ్ రంగంలో పని చేసి, రిటైరయ్యాక కవిత్వం రాయడం, కధలు రాయడం, ఇంగ్లీష్ నుండి తెలుగుఅనువాదాలు చేస్తున్నారు.

View all posts