స్వర్గనరకాల చెంత

చిరుగుల చెడ్డిలో కాలిన బ్రెడ్డులో
ఆకలి ఆకలిని వేటాడుతుంది
కళ్లకింది గుంటల్లో కన్నులమెరుపు క్షీణిస్తుంటే
బొమికలగూళ్ల మీది ముసుగులోంచి
మరణం తొంగిచూస్తుంటుంది
నెనరు లేని గాలి దుఃఖవాక్యాన్ని నేస్తుంది
బుధీర్ రామ్ బస్తీలోని బిషు ముండా
కలలో కలను అల్లుతుంటాడు
రేగడిమన్ను వాడితో ఆడుకుంటుంటే
నేలతల్లి వాడి మాటల్ని వింటూ వుంటుంది
దారంతో లాగబడే వాడిబండిలో పురాణసామగ్రి వుంటుంది
పచ్చిక నిండిన కలల లోయలో పడవ నడిపేవాడవుతాడు వాడు
వాడి స్వప్నాల్లో తడిసిన కాగితప్పడవ
ఊహాజనిత ఆదర్శనగరాన్ని చేరుతుంది
వాడి ఇసుకమేడల్లో కలలు నిద్రపోతాయి
బద్ధకపు పగటివేళ అలసిన చెట్టునీడలో
పక్షులు వాడికి జోల పాడుతాయి
చీమిడి నిండిన వాడిముక్కు చుట్టూ
ఈగలు హుషారుగా రొద చేస్తుంటాయి
కానీ, తెగులు సోకిన పంటచేనులా
తప్పెటలు తుప్పుపట్టి మూగబోతాయి
స్వప్నాల కింద స్వప్నాలు, పదాలకింద పదాలు
నరకంలాంటి నవ్వుమీంచి దేవకన్యల మెరుపులు నడిచిపోతుంటాయి
ఆకాశం నుండి ఆర్తనాదాలు కిందికి జారుతాయి
పత్రహరితపు మైకాన్ని శాశ్వతమౌనం కబళిస్తుంది
పరాజితుడుగా మిగిలి వాడు

ఆంగ్లమూలం: సంజిత్ సర్కార్

ఎలనాగ

ఎలనాగ: అసలుపేరు డాక్టర్ నాగరాజు సురేంద్ర. పుట్టింది కరీంనగర్ జిల్లాలోని ఎలగందులలో, 1953. చిన్నపిల్లల డాక్టరు కాని, ప్రాక్టీసు చెయ్యటం లేదు. రాష్ట్రప్రభుత్వ వైద్య ఆరోగ్యశాఖలో పని చేసి, డెప్యూటీ కమిషనర్ స్థాయి హోదాలో 2012 లో పదవీ విరమణ.
ఇప్పటి వరకు 24 పుస్తకాలు రాశారు. పన్నెండు స్వతంత్ర రచనలు, 12 అనువాదాలు. అనువాదాల్లో 8 ఇంగ్లిష్ నుండి తెలుగులోకి, 4 తెలుగునుండి ఇంగ్లిష్ లోకి. తెలుగులో వచనకవితా సంపుటులు, ఛందోబద్ధ పద్యాల సంపుటి, ప్రయోగపద్యాల సంపుటులు, గేయాల సంపుటి, భాష గురించిన వ్యాసాల సంపుటులు, ప్రాణిక గళ్లనుడికట్ల పుస్తకం.
లాటిన్ అమెరికన్ కథలు, ఆఫ్రికన్ కథలు, ప్రపంచదేశాల కథలు, సోమర్సెట్ మామ్ కథలు - తెలుగు చేశారు. కవిత్వాన్ని ఇంగ్లిష్ నుండి తెలుగు లోకి, తెలుగునుండి నుండి ఇంగ్లిష్ లోకి అనువదించారు. వట్టికోట ఆళ్వారు స్వామి రచించిన ‘జైలు లోపల’ ను Inside the Prison పేరుతో, పవన్ కుమార్ వర్మ రాసిన Ghalib: The Man The Times ను ‘గాలిబ్ - నాటి కాలం’ శీర్షికతో ఆంగ్లంలోకి అనువదించారు. శాస్త్రీయ సంగీతం మీద స్వయంగా రాసిన తెలుగు కవితలను Memorable Melody Makers and Other Poems on Music పేరిట అనువదించి, ప్రచురించారు. తెలంగాణ సాహిత్య అకాడమి వారు ప్రచురించిన Astitva - Short Fiction from Telangana కు సహసంపాదకత్వం వహించారు. Indian Literature, Muse India, Episteme మొదలైన ప్రింట్/ వెబ్ పత్రికల్లో వీరి అనువాద కవిత్వం అచ్చయింది.

2 comments

Categories

Your Header Sidebar area is currently empty. Hurry up and add some widgets.