కొన్ని వెన్నెల ఉదయాలు
కొన్ని చీకటి మధ్యాహ్నాలు

బయట వెన్నెల హోరు
లోన చీకటి దీపం;
బద్దలైన నీ తిమిర కిరణాలు
ఒంటరి నిర్ణిద్ర గది గోడలను ఢీకొని
నేల రాలుతుంటవి.

నీవు కట్టుకున్న అగ్గిపెట్టెలో
నీవు
నిన్ను నీవు బంధించుకున్న
బంగరు రెక్కవు.
ఎంత గింజుకున్నా
రేయి చల్లారదు
ఈ తుఫాను రాత్రి నిద్రించదు,
ఏ చలువ శశిరేఖా లోనికి రాదు
నీ ఉక్కపోత బయటికి పోదు.

ఎన్ని వెన్నెల ఉదయాలను దాటి వచ్చావో
ఈ చీకటి మధ్యాహ్నాల ఏకాంతంలోకి !
ఎన్ని వెన్నెల దారులను పేనుకున్నావో
ఈ చీకటింటి సాలెగూడు అల్లుకోడానికి !

వ్యాకుల దుమారాలు రొదచేస్తున్న
ఈ తిమిర సైకత తిన్నెలలో
నీవు
నీ పద ముద్రలను కోల్పోయిన
నిరుపేద బికారివి,
నీ ఒయాసిస్సులను వెతుక్కుంటున్న
ఒంటరి బిడారివి.

నాగరాజు రామస్వామి

నాగరాజు రామస్వామి. స్వగ్రామం : ఎలగందుల, కరీంనగరం జిల్లా, తెలంగాణ. పుట్టిన తేది : 9- 9 -1939 విద్య : B .Sc , B .E ., శాంతినికేతన్ లో 6 నెలల సాంఘిక విద్యా ట్రైనింగ్ . ఉద్యోగ పర్వం : పదేళ్లు ఎలక్ట్రిక్ ఇంజనీరుగా ఇండియాలో, పాతిక సంవత్సరాలు నైజీరియా, ఘాన, ఓమన్, సౌదీఅరేబియా లో టెక్సటైల్ కంపెనీలలో, చీఫ్ఇంజినీరుగా, ప్రాజెక్ట్ మానేజర్ గా. నివాసం : హైద్రాబాద్ . ప్రచురణలు : ఆంగ్ల కవితా సంపుటాలు -2 , స్వీయ కవితా సంపుటాలు - 3 , వచనం -1 , అనువాద కవితా సంపుటాలు - 7 ( జాన్ కీట్స్ కవితా వైభవం, గీతాంజలి, ఆక్టేవియో పాజ్ సూర్యశిల / Sunstone , అనుధ్వని, అనుస్వరం, అనుస్వనం, కల్యాణ గోద ) - మొత్తం 13 . అముద్రిత కవితా సంపుటాలు - 2 . మొదట్లో కొన్నాళ్ళు "ఎలనార" కలం పేరుతో కవితలు రాశారు. ప్రస్తతం: సిటిజన్ షిప్ కోసం వేచిఉన్న గ్రీన్ కార్డు హోల్డెర్ని. ముగ్గురు పిల్లలు. ఇద్దరు కూతుర్లు, ఒక కొడుకు - సన్నీవేల్, ఆస్టిన్, డాలస్ లలో.

Add comment

Categories

Your Header Sidebar area is currently empty. Hurry up and add some widgets.